ਬਾਬਾ Ramdev ਦਾ ‘Ayurvedic hookah’ ਸੋਸ਼ਲ ਮੀਡੀਆ ’ਤੇ ਵਾਇਰਲ; ਇੰਟਰਨੈੱਟ ’ਤੇ ਛਿੜੀ ਚਰਚਾ

ਚੰਡੀਗੜ੍ਹ:

ਯੋਗ ਗੁਰੂ ਬਾਬਾ ਰਾਮਦੇਵ ਦੀ ਇੱਕ ਵੀਡੀਓ ਸੋਸ਼ਲ ਮੀਡੀਆ ’ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਹੀ ਹੈ, ਜਿਸ ਵਿੱਚ ਉਹ ਕਥਿਤ ਤੌਰ ’ਤੇ ਇੱਕ “ਆਯੁਰਵੈਦਿਕ ਹੁੱਕਾ” ਤਿਆਰ ਕਰਦੇ ਨਜ਼ਰ ਆ ਰਹੇ ਹਨ। ਜੜ੍ਹੀ-ਬੂਟੀਆਂ ਦੇ ਇਸ ਅਨੋਖੇ ਮਿਸ਼ਰਣ ਅਤੇ ਇਸ ਦੇ ਕਥਿਤ ਸਿਹਤ ਲਾਭਾਂ ਨੂੰ ਲੈ ਕੇ ਇੰਟਰਨੈੱਟ ’ਤੇ ਉਤਸੁਕਤਾ ਦੇ ਨਾਲ-ਨਾਲ ਇੱਕ ਨਵੀਂ ਬਹਿਸ ਛਿੜ ਗਈ ਹੈ।

ਸੋਸ਼ਲ ਮੀਡੀਆ ਪਲੇਟਫਾਰਮ ‘ਐਕਸ’ (ਪਹਿਲਾਂ ਟਵਿੱਟਰ) ’ਤੇ ਸਾਂਝੀ ਕੀਤੀ ਗਈ ਇਸ ਵੀਡੀਓ ਵਿੱਚ ਬਾਬਾ ਰਾਮਦੇਵ ਇੱਕ ਮਹਿਲਾ ਦੇ ਨਾਲ ਰਵਾਇਤੀ ਅੰਦਾਜ਼ ਵਾਲਾ ਹੁੱਕਾ ਤਿਆਰ ਕਰਦੇ ਦਿਖਾਈ ਦੇ ਰਹੇ ਹਨ। ਕਲਿੱਪ ਦੌਰਾਨ ਉਹ ਹੁੱਕੇ ਦੇ ਉਪਰਲੇ ਹਿੱਸੇ (ਚਿਲਮ) ’ਤੇ ਮੁਲੱਠੀ ਰੱਖਦੇ ਹੋਏ ਆਖਦੇ ਹਨ, “ਇਸਮੇਂ ਸਾਰੀ ਜੜ੍ਹੀ-ਬੂਟੀਆਂ ਹੈਂ।”

ਇਸ ਤੋਂ ਬਾਅਦ ਉਹ ਇਸ ਮਿਸ਼ਰਣ ਵਿੱਚ ਹਲਦੀ, ਰਾਈ, ਅਜਵਾਇਣ, ਕਪੂਰ ਅਤੇ ਕਾਕੜਾਸਿੰਗੀ ਸਮੇਤ ਕਈ ਹੋਰ ਚੀਜ਼ਾਂ ਸ਼ਾਮਲ ਕਰਦੇ ਹਨ ਅਤੇ ਕਹਿੰਦੇ ਹਨ, “ਯੇਹ ਹੁੱਕਾ ਬਨ ਗਿਆ।” ਵੀਡੀਓ ਵਿੱਚ ਉਨ੍ਹਾਂ ਨੂੰ ਅੱਗ ਉੱਤੇ ਕਪੂਰ ਰੱਖਦੇ ਹੋਏ ਵੀ ਦੇਖਿਆ ਜਾ ਸਕਦਾ ਹੈ। ਵੀਡੀਓ ਦੇ ਇੱਕ ਹਿੱਸੇ ਵਿੱਚ ਬਾਬਾ ਰਾਮਦੇਵ ਇਹ ਦਾਅਵਾ ਕਰਦੇ ਸੁਣਾਈ ਦਿੰਦੇ ਹਨ ਕਿ ਇਸ ਦਾ ਧੂੰਆਂ ਅੰਦਰ ਖਿੱਚਣ ਨਾਲ ਵਾਤ, ਪਿੱਤ ਅਤੇ ਕਫ਼ ਸੰਤੁਲਿਤ ਹੁੰਦੇ ਹਨ ਅਤੇ ਖੰਘ ਤੇ ਬੰਦ ਨੱਕ ਵਰਗੀਆਂ ਸਮੱਸਿਆਵਾਂ ਤੋਂ ਰਾਹਤ ਮਿਲਦੀ ਹੈ।

ਸੋਸ਼ਲ ਮੀਡੀਆ ’ਤੇ ਮਜ਼ਾਕੀਆ ਪ੍ਰਤੀਕਰਮ ਅਤੇ ਮੀਮਜ਼ ਦਾ ਹੜ੍ਹ

ਇਸ ਅਨੋਖੇ ਪ੍ਰਦਰਸ਼ਨ ਤੋਂ ਬਾਅਦ ਆਨਲਾਈਨ ਯੂਜ਼ਰਸ ਵੱਲੋਂ ਕਈ ਤਰ੍ਹਾਂ ਦੇ ਮੀਮਜ਼ ਅਤੇ ਮਜ਼ਾਕੀਆ ਟਿੱਪਣੀਆਂ ਕੀਤੀਆਂ ਜਾ ਰਹੀਆਂ ਹਨ:
ਇੱਕ ਯੂਜ਼ਰ ਨੇ ਲਿਖਿਆ, “ਬਾਬਾ ਜੀ ਨਵੀਂ ਪੀੜ੍ਹੀ ਦੀ ਨਬਜ਼ ਚੰਗੀ ਤਰ੍ਹਾਂ ਪਛਾਣਦੇ ਹਨ।” ਇੱਕ ਹੋਰ ਨੇ ਮਜ਼ਾਕ ਵਿੱਚ ਲਿਖਿਆ, “ਹੁਣ ਸਾਰੇ ਕਲੱਬਾਂ ਤੇ ਪੱਬਾਂ ਵਿੱਚ ਬਾਬਾ ਰਾਮਦੇਵ ਦਾ ਆਯੁਰਵੈਦਿਕ ਹੁੱਕਾ ਬਾਰ ਚੱਲੇਗਾ।” ਕੁੱਝ ਯੂਜ਼ਰਾਂ ਨੇ ਤਨਜ਼ ਕਸਦਿਆਂ ਕਿਹਾ ਕਿ ਸ਼ਾਇਦ ਅਗਲਾ ਕਦਮ ਹੁਣ ‘ਹਰਬਲ ਦਾਰੂ’ ਹੋਵੇਗਾ, ਜਦਕਿ ਇੱਕ ਨੇ ਲਿਖਿਆ ਕਿ ਉਹ ਇਸ ਸਮੱਗਰੀ ਵਿੱਚ ‘ਅਦਰਕ-ਲਸਣ ਦਾ ਪੇਸਟ’ ਪਾਉਣਾ ਭੁੱਲ ਗਏ।

ਦੂਜੇ ਪਾਸੇ ਕੁੱਝ ਯੂਜ਼ਰਾਂ ਨੇ ਇਸ ਨੂੰ ਪ੍ਰਾਚੀਨ ਪਰੰਪਰਾ ਨਾਲ ਜੋੜਦਿਆਂ ਕਿਹਾ ਕਿ ਪ੍ਰਾਚੀਨ ਭਾਰਤ ਵਿੱਚ ਧੂੰਏਂ ਰਾਹੀਂ ਇਲਾਜ ਕਰਨ ਦੀ ਪ੍ਰਣਾਲੀ ਮੌਜੂਦ ਸੀ।

ਕੀ ਜੜ੍ਹੀ-ਬੂਟੀਆਂ ਦੇ ਧੂੰਏਂ ਦਾ ਸੇਵਨ ਸਿਹਤ ਲਈ ਸੁਰੱਖਿਅਤ ਹੈ?

ਵਾਇਰਲ ਵੀਡੀਓ ਸਾਹਮਣੇ ਆਉਣ ਤੋਂ ਬਾਅਦ ਜੜ੍ਹੀ-ਬੂਟੀਆਂ ਅਤੇ ਘਰੇਲੂ ਮਸਾਲਿਆਂ ਦਾ ਧੂੰਆਂ ਅੰਦਰ ਖਿੱਚਣ ਦੀ ਸੁਰੱਖਿਆ ਨੂੰ ਲੈ ਕੇ ਮੈਡੀਕਲ ਹਲਕਿਆਂ ਵਿੱਚ ਸਵਾਲ ਖੜ੍ਹੇ ਹੋ ਗਏ ਹਨ। ਮਾਹਿਰਾਂ ਅਨੁਸਾਰ ਅਜਿਹੇ ਕੋਈ ਠੋਸ ਕਲੀਨਿਕਲ ਪ੍ਰਮਾਣ ਮੌਜੂਦ ਨਹੀਂ ਹਨ ਜੋ ਇਹ ਸਿੱਧ ਕਰਦੇ ਹੋਣ ਕਿ ਇਸ ਤਰ੍ਹਾਂ ਧੂੰਆਂ ਅੰਦਰ ਲੈਣਾ ਖੰਘ, ਜ਼ੁਕਾਮ ਜਾਂ ਸਾਹ ਦੀਆਂ ਬਿਮਾਰੀਆਂ ਲਈ ਇੱਕ ਸੁਰੱਖਿਅਤ ਜਾਂ ਪ੍ਰਭਾਵਸ਼ਾਲੀ ਇਲਾਜ ਹੈ।

ਡਾਕਟਰਾਂ ਦਾ ਮੰਨਣਾ ਹੈ ਕਿ ਕਿਸੇ ਵੀ ਤਰ੍ਹਾਂ ਦਾ ਧੂੰਆਂ ਸਾਹ ਨਾਲੀਆਂ ਵਿੱਚ ਜਲਨ ਪੈਦਾ ਕਰ ਸਕਦਾ ਹੈ ਅਤੇ ਇਹ ਖ਼ਾਸ ਕਰਕੇ ਦਮਾ (Asthma) ਜਾਂ ਫੇਫੜਿਆਂ ਦੀਆਂ ਪੁਰਾਣੀਆਂ ਬਿਮਾਰੀਆਂ ਤੋਂ ਪੀੜਤ ਮਰੀਜ਼ਾਂ ਲਈ ਨੁਕਸਾਨਦੇਹ ਸਾਬਤ ਹੋ ਸਕਦਾ ਹੈ।

ਜ਼ਿਕਰਯੋਗ ਹੈ ਕਿ ਇਸ ਤੋਂ ਪਹਿਲਾਂ ਵੀ ਨਿਕੋਟੀਨ-ਮੁਕਤ ਹਰਬਲ ਉਤਪਾਦਾਂ ਨੂੰ ਲੈ ਕੇ ਚਰਚਾ ਹੁੰਦੀ ਰਹੀ ਹੈ। ਹਰਿਦੁਆਰ ਦੇ ਇੱਕ ਆਯੁਰਵੈਦਿਕ ਕਾਲਜ ਨੇ ਸਿਗਰਟਨੋਸ਼ੀ ਛੁਡਵਾਉਣ ਲਈ ਆਯੁਰਵੈਦਿਕ ਜੜ੍ਹੀ-ਬੂਟੀਆਂ ਵਾਲੀ ਇੱਕ ‘ਹਰਬਲ ਸਿਗਰਟ’ ਦਾ ਪ੍ਰਚਾਰ ਕੀਤਾ ਸੀ, ਹਾਲਾਂਕਿ ਖੋਜਕਰਤਾਵਾਂ ਦਾ ਕਹਿਣਾ ਹੈ ਕਿ ਇਸ ਸਬੰਧੀ ਪੁਖ਼ਤਾ ਵਿਗਿਆਨਕ ਅੰਕੜੇ ਇਕੱਠੇ ਕੀਤੇ ਜਾਣੇ ਅਜੇ ਬਾਕੀ ਹਨ।