Ludhiana: ਬਿਨਾਂ ਡਰਾਈਵਰ ਤੋਂ ਆਪਣੇ-ਆਪ ਚੱਲੀ MG Windser EV ਕਾਰ, ਦੁਕਾਨ ਅਤੇ ਦਰੱਖਤ ‘ਚ ਵੱਜੀ

ਲੁਧਿਆਣਾ, 16 ਸਤੰਬਰ:

ਲੁਧਿਆਣਾ ਤੋਂ ਸੋਸ਼ਲ ਮੀਡੀਆ ‘ਤੇ ਇੱਕ ਹੈਰਾਨ ਕਰਨ ਵਾਲਾ ਵੀਡੀਓ ਤੇਜ਼ੀ ਨਾਲ ਵਾਇਰਲ ਹੋ ਰਿਹਾ ਹੈ, ਜਿਸ ਵਿੱਚ ਇੱਕ ਇਲੈਕਟ੍ਰਿਕ ਕਾਰ (MG Windsor EV) ਬਿਨਾਂ ਕਿਸੇ ਡਰਾਈਵਰ ਦੇ ਖ਼ੁਦ-ਬਖ਼ੁਦ ਸੜਕ ‘ਤੇ ਦੌੜਦੀ ਨਜ਼ਰ ਆ ਰਹੀ ਹੈ। ਵਾਇਰਲ ਵੀਡੀਓ ਮੁਤਾਬਕ ਕਾਰ ਕੰਟਰੋਲ ਤੋਂ ਬਾਹਰ ਹੋ ਕੇ ਪਹਿਲਾਂ ਸੜਕ ਕਿਨਾਰੇ ਇੱਕ ਵਿਕਰੇਤਾ ਨਾਲ ਅਤੇ ਬਾਅਦ ਵਿੱਚ ਦਰੱਖਤ ਨਾਲ ਜਾ ਟਕਰਾਈ। ਟਕਰਾਉਣ ਤੋਂ ਬਾਅਦ ਵੀ ਗੱਡੀ ਦੇ ਪਹੀਏ ਘੁੰਮਦੇ ਰਹੇ ਅਤੇ ਅਗਲੇ ਹਿੱਸੇ ਵਿੱਚੋਂ ਧੂੰਆਂ ਨਿਕਲਦਾ ਦੇਖਿਆ ਗਿਆ।

ਮਾਲਕ ਕਹਿੰਦਾ ਰਿਹਾ — ਗੱਡੀ ਲਾਕ ਹੈ ਤੇ ਕੰਟਰੋਲ ਵਿੱਚ ਨਹੀਂ

ਵਾਇਰਲ ਕਲਿੱਪ ਵਿੱਚ ਵਾਹਨ ਦਾ ਮਾਲਕ ਗੱਡੀ ਦੇ ਨਾਲ-ਨਾਲ ਭੱਜਦਾ ਹੋਇਆ ਆਸ-ਪਾਸ ਦੇ ਲੋਕਾਂ ਨੂੰ ਸਾਵਧਾਨ ਕਰ ਰਿਹਾ ਹੈ। ਉਸ ਦਾ ਦਾਅਵਾ ਹੈ ਕਿ ਕਾਰ ਪੂਰੀ ਤਰ੍ਹਾਂ ਲਾਕ ਹੈ ਪਰ ਇਸ ‘ਤੇ ਉਸ ਦਾ ਕੋਈ ਕੰਟਰੋਲ ਨਹੀਂ ਰਿਹਾ। ਹਾਦਸੇ ਦੌਰਾਨ ਕਾਰ ਦਾ ਅਗਲਾ ਟਾਇਰ ਬੇਕਾਬੂ ਹੋ ਕੇ ਘੁੰਮਦਾ ਦਿਖਾਈ ਦਿੱਤਾ। ਭੀੜ ਵਿੱਚੋਂ ਕੁਝ ਲੋਕਾਂ ਨੇ ਸਥਿਤੀ ਨੂੰ ਸੰਭਾਲਣ ਲਈ ਗੱਡੀ ਦੀ ਖਿੜਕੀ ਦਾ ਸ਼ੀਸ਼ਾ ਤੋੜਨ ਦੀ ਵੀ ਕੋਸ਼ਿਸ਼ ਕੀਤੀ। ਹਾਲੇ ਤੱਕ ਇਹ ਸਾਫ਼ ਨਹੀਂ ਹੋ ਸਕਿਆ ਕਿ ਇਹ ਘਟਨਾ ਅਸਲ ਵਿੱਚ ਕਿਵੇਂ ਵਾਪਰੀ ਅਤੇ ਗੱਡੀ ਦੇ ਆਪਣੇ-ਆਪ ਚੱਲਣ ਦਾ ਅਸਲ ਕਾਰਨ ਕੀ ਸੀ।

ਤਕਨੀਕੀ ਖ਼ਾਮੀ ਦੀ ਚਰਚਾ, ਅਜੇ ਤੱਕ ਕੋਈ ਅਧਿਕਾਰਤ ਬਿਆਨ ਨਹੀਂ

ਸੋਸ਼ਲ ਮੀਡੀਆ ‘ਤੇ ਯੂਜ਼ਰਸ ਵੱਲੋਂ ਇਸ ਨੂੰ ਲੈ ਕੇ ਤਰ੍ਹਾਂ-ਤਰ੍ਹਾਂ ਦੀਆਂ ਚਰਚਾਵਾਂ ਕੀਤੀਆਂ ਜਾ ਰਹੀਆਂ ਹਨ। ਕੁਝ ਲੋਕਾਂ ਦਾ ਮੰਨਣਾ ਹੈ ਕਿ ਇਹ ਆਧੁਨਿਕ ਸੌਫਟਵੇਅਰ ਜਾਂ ਆਟੋ-ਪਾਰਕ ਅਸਿਸਟ ਵਰਗੇ ਫ਼ੀਚਰਸ ਵਿੱਚ ਕਿਸੇ ਤਕਨੀਕੀ ਨੁਕਸ ਕਾਰਨ ਹੋ ਸਕਦਾ ਹੈ। ਹਾਲਾਂਕਿ, ਐੱਮ.ਜੀ. ਮੋਟਰ ਇੰਡੀਆ (MG Motor India) ਜਾਂ ਸਥਾਨਕ ਪੁਲੀਸ ਪ੍ਰਸ਼ਾਸਨ ਵੱਲੋਂ ਅਜੇ ਤੱਕ ਇਸ ਘਟਨਾ ਨੂੰ ਲੈ ਕੇ ਕੋਈ ਵੀ ਅਧਿਕਾਰਤ ਪੁਸ਼ਟੀ ਜਾਂ ਬਿਆਨ ਜਾਰੀ ਨਹੀਂ ਕੀਤਾ ਗਿਆ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਗੱਡੀ ਦੇ ਸਿਸਟਮ ਦੀ ਅਧਿਕਾਰਤ ਜਾਂਚ ਅਤੇ ਡਾਟਾ ਵਿਸ਼ਲੇਸ਼ਣ ਤੋਂ ਬਿਨਾਂ ਕਿਸੇ ਖ਼ਾਸ ਤਕਨੀਕੀ ਨੁਕਸ ਦਾ ਸਿੱਟਾ ਕੱਢਣਾ ਜਲਦਬਾਜ਼ੀ ਹੋਵੇਗੀ।